「萬聖節」傳統活動係「咬蘋果」？

今朝阿史就同史友們介紹到「萬聖節」嘅起源，亦都講到呢一日有幾樣傳統嘅活動，就好似會着上奇裝異服、戴上面具周圍去「嚇鬼」，亦都會每家每戶咁拎糖。除咗呢兩個大部分人都會做嘅傳統活動，原來「萬聖節」仲會咬蘋果架喎！

「咬蘋果」又係點樣進行呢？喺呢個活動入面，就會將好多嘅蘋果放入去一個裝滿水嘅盆入面，參加嘅人就要諗辦法用自己個口將漂浮嘅蘋果咬上嚟，呢個活動主要就喺愛爾蘭凱里郡流行，成個活動被稱為Snap Apple。咁呢個活動到底有咩寓意呢？原來喺羅馬不列顛時代，當時羅馬人係帶埋象徵波摩納女神嘅蘋果樹去到不列顛，未婚嘅女性就會進行呢個活動，首先咬到蘋果嘅人就會被認為係第一個可以結到婚嘅人。

由於波摩納係「果樹之神」，掌管所有果樹生死豐收，蘋果豐收期臨近萬聖夜，所以當時嘅人就將呢個活動同埋萬聖節結合埋一齊，喺萬聖節前夜進行，目的都係想慶祝豐收。